Søknadsinformasjon og rapportering
Generell informasjon
Finansmarknadsfondet støttar prosjekt innanfor forsking og allmennopplysning som skal gi betre kunnskap om korleis finansmarknadene fungerer. Prosjekta skal også føre til meir etisk medvit.
I 2022 fekk Finansmarknadsfondet 16 søknader om nye allmenn-opplysningsprosjekt, 15 søknader om nye forskarprosjekt og tre søknader om støtte til faglege arrangement. Av desse vart åtte allmennopplysningsprosjekt, fem forskarprosjekt og tre faglege arrangement innvilga økonomisk støtte. I tillegg innvilga styret vidare finansiering av eit pågåande allmennopplysningsprosjekt og 10 pågåande forskarprosjekt.
Moglegheiter for administrativ vurdering av førebelse prosjektskildringar (skisser)
Som søkjarar kan du få ei administrativ vurdering av førebelse prosjektskildringar (skisser) i forkant av søknadsfristane.
Dette kan skje i form av eit dialogmøte eller gjennom skriftlege kommentarar, og er basert på eit skriftleg underlag frå søkjar. Ei administrativ vurdering føreset at søkjar er ute i god tid, både fordi det kan vere tidkrevjande å omarbeide søknaden basert på tilbakemeldingane, og fordi sekretariatet får mange førespurnader tett opptil søknadsfristane. Av erfaring vil ei administrativ vurdering bidra til å gjere søknaden båded betre og meir tydeleg.
Vi tilrår spesielt nye søkjarar å nytte seg av dette tilbodet.
Forskarprosjekt
Finansmarknadsfondet finansierer forskarprosjekt, inkludert doktorgrads- og postdoktorstipend. I samband med dette bør du merke deg at Finansdepartementets regelverk for Finansmarknadsfondet stiller særskilde krav til publisering. Det skal også vere betydeleg fagleg spreiing i bruken av midlane til fondet.
Sjå eiga rettleiing på denne sida for meir informasjon.
For å stimulere til meir populærvitskapleg publisering, kan Finansmarknadsfondet utbetale ein publiseringsbonus på 20 000 kroner per kronikk/debattinnlegg med basis i forskarprosjekt med finansiering frå fondet.
Søknadsfrist i 2023 er 24. mai kl 13.00.
Lenkje til søknadsskjemaet blir seinast aktivert seks veker før søknadsfristen.
Allmennopplysningsprosjekt
Finansmarknadsfondet finansierer allmennopplysningsprosjekt. Vi legg spesielt vekt på at de har ei klårt definert målgruppe og ein gjennomtenkt formidlingsplan i slike prosjekt.
For tekster og visuelle produkt er det utarbeidd ein særskild rettleiar.
Sjå eige vedlegg på denne sida for meir informasjon.
Søknadsfristane i 2023 er 8. februar og 13. september. For begge datoer går fristen ut kl 13.00.
Lenkje til søknadsskjemaet blir seinast aktivert seks veker før søknadsfristen.
Faglege kurs og konferansar
Forskingsorganisasjonar kan søkje om støtte frå Finansmarknadsfondet til faglege arrangement. Finansmarknadsfondet har ikkje eit eige budsjett øyremerkt arrangementsstøtte.
Utlysinga har løpande søknadsfrist, men avlesing vil vere i samband med søknadsfristane. Styret i Finansmarknadsfondet har vedtaksmøter i mars og i oktober/november.
Rapportering
Finansmarknadsfondets standard rapporteringsskjema for allmennopplysningsprosjekt finn du på denne sida. Alle rapportar skal ha dato og signatur.
For forskarprosjekt og faglege arrangement skal du rapportere via Mitt nettsted.